BUZANI KUBAWO IMIBUZO EMIDE

FEBR- MARCH 2018

UMBUZO 1
Ingaba umbhali uyisebenzise njani ingxoxo ukuzoba isimo sikaGugulethu?Xhasa impendulo
ngokucaphula ebalini.

Ingxoxo sisesinye sezixhobo eziphambili zedrama. Isisixhobo sokutyhila izimo

zabalinganiswa, ukudandalazisa imo, nomoya webali kunye neemvakalelo, iingcinga
nezimvo zabalinganiswa. Ngalinye, ingxoxo kunokuthiwa sisiseko sedrama. Nakule ncwadi
ithi, 'Buzani Kubawo', njengencwadi eyidrama, umbhali uyisebenzise ingxoxo ukutyhila
izimo zabalinganiswa. Umlinganiswa onguGugulethu, isimo sakhe umbhali usityhile
ngamazwi akhe, aqulathe iingcinga, izimvo neemvakalelo zakhe.

Ukusetyenziswa kwengxoxo njengesixhobo sokutyhila isimo somlinganiswa

onguGugulethu:

• UGugulethu uvezwa ngumbhali njengetyendyana elisaze ngobuso ezweni, kwaye

onothando osanambitha impilo yobufana bakhe, oku kuvela xa ethetha noMzamo
ongumhlobo wakhe esenjenje, 'unyanisile ukuthi awulazi, eneneni andizange
ndithethe ngalo mntwana kuwe ... Lo mntwana sasifunda kunye kwaBly. Ndaqala
ukumbona apho, ndamthanda, ndamthanda ngolona hlobo lungathethekiyo'.
• Ungumntu onendlela ekhethekileyo yokuchonga amagama xa ethetha nentombi
ajonge ukuthimba intliziyo yayo, mve xa esithi, 'wena Jola uthi 'ndiza'. Mna akuhli
ngoku ukutya endikutyayo. Andithethi bona ubuthongo, ndithi ndakucinga ngawe
bumke bonke, ngoku into eseleyo ngamashwa ukuba abe phezu kwam ngenxa
yakho.  UGugulethu ungumntwana obathobeleyo abazali bakhe, oku kuvela
kwingxoxo athe wanayo nabo xa uZwilakhe embuza ukuba ucinga ntoni
ngokutshata. Impendulo kaGugulethu ithi, 'Kaloku mna ndijonge kuni, akukho nto
ndinokuyenza de ndive ngani. NgokukaGugulethu kubalulekile ukuba afumane
imvume kubazali bakhe kuqala.
• Oku kuthobeka kwakhe akahlukananga nako nangona engahambisani nesigqibo
sikatata wakhe sokumbonela intombi amakayithathe, uphendula enjenje, 'Noko
bobawo le ndawo yokubona bendicela ukuba niyiyekele kum, ningade
nixambulisane ngayo kakhulu'.
• Uthi uGugulethu akuzama ukucela kuyise ukuzibonela intombi amakayitshate,
amise ngesiko uZwilakhe, apho amxelela ngqo ukuba yena akazi kwaphula siko
uGugulethu oko ukulandelisa ngala mazwi alandelayo athi, 'uthi akwaphuli siko
utsho ulikroboza, into ke leyo endingayingene'.

• Akufumanisa ukuba uZwilakhe akajiki kwisigqibo sakhe sokumbonela intombi,

uzama ngazo zonke iindlela ukumbonisa imposiso ayenzayo, oku ukwenza
ngokumkhumbuza ngamazwi 'okufunza' awakhe wawathetha mhlana babeshukuxa
lo mcimbi wokubonelwa. Nangona ubunzulu bempendulo kaGugulethu ethi
makubuzwe kuyise ibibonisa ukungoneliseki nokungayingeni le nto yokubonelwa
intombi, uGugulethu khange agqushalaze uye waqhubeka ukuthobela abazali.
• UGugulethu ungumntu onomqolo, akajiki kwisigqibo sakhe nangona enyanzelwa
ngabazali bakhe, uthando amthanda ngalo uNomaMpondomise uzimisele ukuba
 alunakujikwa nto, oku ukubonakalisa ngamazwi athi, NomaMpondomise sthandwa!
NomaMpondomise Sthandwa! Wena ungowam, we-e-ena ungowam, andiboni
wumbi!
• Uthando analo kuNomaMpondomise nezigqibo ezithathwe ngabazali bakhe
uGugulethu ziyamjika zimenza mntu wumbi, ubonakala njengomntu oshiywa
ziingqondo, oku kubonakala xa ethetha nomhlobo wakhe uMzamo engamazi
nokuba ungubani na.
• Ungumntu ongafuni kuzenza ixoki kuba ngexesha etshatiswa ngumfundisi ecaweni,
iimpendulo zakhe azijiki umi ngelokuba makubuzwe kuyise endaweni yokulandela
izifungo zomtshato. Usebenzisa izikweko ezininzi ukuzama ukutyhila olu
dandatheko lwale ntliziyo yakhe apha kumfundisi.
• UGugulethu uyakwazi ukumcingela omnye umntu kuba uthi xa abona
uNomaMpondomise enkundleni yamatyala esiva nobuhlungu athe wabuzisa
empilweni yakhe, atyhila udandatheko olumandla, uthetha enjenje; 'Buzani
kubawo'. Bawo! Bawo! Uyawabona na la masikizi? Kowu undenzile! Walenza
nesikizi.
• Akufumana isigwebo sakhe uGugulethu ubonakalisa ukusamkela kwaye wenza
nombulelo esitsho esithi simfanele, esi senzo simveza njengomntu oyibonayo
imposiso ayenzileyo kwaye evuma ukuba wonile.
• Ungumntu ongenabundlongondlongo. Oku kuvela ngexesha kufika ooNyaniso
bethunywe ukuza kumlanda, ndaweni yokuba ndlongondlongo usuka abacacisela
mhlophe ukuba soze agoduke kuba akanakhaya. Utsho ebakhumbuza ngamazwi
ayethethwe nguNomaMpondomise athi, 'kugqityiwe', ebacacisela ukuba wathi
akuphuma lo 'kugqityiwe' kwintombi kaLangeni naye wangqina wathi 'kugqityiwe',
kwathiwa ezulwini Amen.
• Ngumntu okholwayo kuba uvela njengomlinganiswa okholelwa ukuba ingxaki
iyalunga ngomthandazo. Oku kuvela xa endulula ooNyaniso abonakalisa ukuba
akasokuze alubeke olwakhe unyawo kowabo esaphila, ude abacele ukuba
bambulisele kubazali bakhe kwaye abacele ukuba bamthandazele.

• Unempoxo kuba akufika uThobeka nabantwana bakhe eMthatha, uGugulethu

uyambuza ukuba uThobeka uyaphi, konke oku ukwenza ngendlela ephoxisayo mve
xa angcambazisa uThobeka ngemibuzo esithi 'Ude wathi uyaphi na ntombi
yasemaBheleni?'  Umbhali usiveze isimo sikaGugulethu ngokusebenzisa amazwi
achongiweyo kuzo zonke iingxoxo zakhe kule drama.

MAY-JUNE 2019
UMBUZO 2
HLALUTYA ISAKHIWO SALE DRAMA

Umbhali wedrama uye abe nendlela ethile yokubhala incwadi yakhe ukukhulisa ibali lakhe. Ndlela
leyo athi asebenzise ubuchule bakhe bokuyila ingxoxo ngeenzame
zokuphuhlisa iinjongo zakhe nokukhupha umdlalo ophume izandla. Le mpumelelo iye

ivezwe ngala manqanaba alandelayo; ingabula-zigcawu, ukuyondelelana,uvuthondaba,

isisombululo nesiphelo sebali.
Ingabula-zigcawu

• Apha kwesi sigaba izithole zempixano zithi zivezwe kwaye kulapho sithi nesimo

sentlalo sityhilwe khona, kuze kwaziswe nabalinganiswa abaphambili apha encwadini. Kule
ncwadi kaTamsanqa sidibana noNozipho encokola nomama wakhe uMaGaba, uNozipho
uzivalele endlwini enomsi kwaye uhleli yedwa. Konke oku kwenzeka kwilali yaseZazulwana
endlwini kaZwilakhe ongumninimzi weli khaya.

• Ngokusichazela ngaba balinganiswa umbhali ukhulisa isakhiwo sakhe sebali kuba

ubaveza ekuqaleni kwaye ngabo abakhulisa ibali.

• Umbhali usebenzisa umsi kwakhona ukuphuhlisa injongo ethile nokukhulisa isakhiwo sakhe
sebali. KwaXhosa umsi unentsingiselo engentlanga, kwaye umbhali ngokusebenzisa umqondiso
womsi uyasikrobisa ukuba kukho okubi okuza kwenzeka apha encwadini.

• Inkcazelo asinika yona yabantu abahambileyo ukuya emtshatweni inento

eyityhilayo ngento eza kwenzeka apha encwadini. Incoko ephakathi koMaGaba

nentombi yakhe uNozipho ngomtshato neminqweno kaMaGaba iyikhulisa ngakumbi impixano

kule drama.
• Ingoma evunywa nguNozipho ethi 'Dilika Thando lwam', iqulethe lukhulu kwaye iyasikrobisa
ukuba impixano eza kuthi yenzeke kule ncwadi iza ngothando.

• Umbhali ube nobuchule bokuyila isakhiwo sale ncwadi ngesakhono sakhe

sokukwazi ukuyikhulisa ngokuthi asebenzise uMaGaba ukuba afuthele indoda

yakhe ngomoya wokubonela uGugulethu ongunyana wabo umfazi.

• Umbhali uphinda asebenzise uZwilakhe ekuyileni esi sakhiwo kuba uthi akuyiva le nyewe
ngomfazi wakhe abethe ngenqindi phantsi efunga esithi akasayi kujika kwisigqibo sokuba
uGugulethu atshate intombi kaMcothama. Oku ukwenza engekaziva ezikaGugulethu izimvo
kwaye sele ebonakala ukuba akazise so. Igama athe wamnika lona lo mlinganiswa ebemnika
ngenjongo waze naye Zwilakhe walilandela akajika.

Ukuyondelelana kwezinto
• Kweli nqanaba uyilo lwesakhiwo luya lukhula ngokukhula kuba ingxabano
nokungaboni ngasonye kuya kuthatha unyawo. Umbhali usebenzise indlela apha
ebonisa ubuchule bakhe obungummangaliso kuba usebenzisa uZwilakhe ukondlala lo
mcimbi wokuzeka kukaGugulethu ekukhuliseni nasekuyileni ngakumbi ibali lakhe.
• Uxambuliswano nokungaboni ngasonye kukaZwilakhe noGugulethu unyana wakhe
ngombandela wokubonelwa luya luthatha unyawo. Olu xambuliswano alukho
phakathi koGugulethu noZwilakhe uyise kuphela, koko kungenelele namaHlubi atsho
ahlukana kubini.
• Umbhali uphinda asivezele umlinganiswa onguNomaMpondomise ngenjongo yokuyila
nokwenza luqilima mpela esi sakhiwo. Ukwamkela kukaNomaMpondomise isicelo
sokuthandana noGugulethu kwenza nzima izinto ngakumbi nangakumbi.
• Indima kaNomaMpondomise apha kulo mdlalo kukuza kuqinisa intliziyo kaGugulethu
ngakumbi ngothando analo kuNomaMpondomise nokuza kukhulisa ngakumbi
uxambuliswano phakathi kukaGugulethu noZwilakhe utata wakhe.
• UThobeka usetyenziswe njengomqobo oze kuxaba kwindlela eya empumelelweni
kaGugulethu noNomaMpondomise. Igama alinikiweyo lenza ukuba kube nzima kuye
ukuvakalisa izimvo zakhe ngokupheleleyo. Konke oku kwenzeka ngenjongo yokuyila
ngakumbi esi sakhiwo sale ncwadi.

Uvuthondaba
• Umbhali uya eliqamangela ngokuliqamangela iqhina lakhe lokuyila isakhiwo sale ncwadi. Oku
ukwenza ngokudulisa uvakalelo lwabalinganiswa baphumele elubala bazitsho zicace gca
okwekat'emhlophe ehlungwini izimvo zabo. UNomaMpondomise ukhupha iinkomo
zikaMcunukelwa obesele emlobole ngenxa kaGugulethu.
• Uyilo lwesakhiwo luya lunyuka umnqantsa, uGugulethu utshatiswa ngebhaxa noThobeka
angamthandiyo. Naye uThobeka kwelakhe icala akonwabanga sesi senzo kodwa ngenxa
yokuthobela abazali wafa namthanyana.
• UMzamo ongumhlobo osenyongweni kaGugulethu uhlatywa asweleke emtshatweni
kaGugulethu.
Limtshonela emini ilanga uGugulethu, oku kuvezwa ngamazwi awasebenzisayo athi,
'Liqalisile! Liqalisile! Liyaduduma! La mazwi kaGugulethu abonisa mhlophe ukudandatheka
kwentliziyo yakhe kwaye akwatyhila ukuba umdlalo ngoku uyaya kwayiwayo kuza
kuqhawuka unobathana.

• Njengoko izinto zisiya kwayiwayo, umbhali usebenzisa iphepha-ndaba ukuchaza ngokusweleka

kukaMzamo emtshatweni kaGugulethu. Njengoko zingalali mbetheni
ziye zafika nakuNomaMpondomise ezi ndaba wanga angathi vuleka mhlaba.

• Ukuzikhupha kule ngxubakaxaka uNomaMpondomise umangalela uGugulethu

kwinkundla yamatyala eMthatha. Uyilo lwesakhiwo luya ngokuba mandundu kuba

uNomaMpondomise uye waya kuzenyelisa emlanjeni wabhubha.
• Umama kaNomaMpondomise uManyawuza naye ulandela intombi yakhe ukuya
kwantsonganyawana.

• UGugulethu ngokwasezingqondweni ukwelakhe ilizwe, mve xa esithi, Liyaduduma!

Liyaduduma! Lidlula nemiphefumlo. Buzani kubawo! La mazwi kaGugulethu

abonisa mhlophe ukuba ngoku izinto zijikile kukekelelwa ekusonjululweni kwezinto.

Isisombululo

• UZwilakhe uthumela uThobeka nabantwana bakhe kuGugulethu eMthatha. Isizathu

sesenzo sikaZwilakhe kukuba yena Zwilakhe akanakondlela enye indoda usapho yona isidla
amazimba. NgokukaZwilakhe sesona sisombululo sisiso esi sokuzama ukuthi xibilili
umthwalo ekudala ewuthwele kaThobeka nabantwana bakhe.

• Isenzo sikaZwilakhe asizi nasisombululo sisiso koko siza nenyhikityha yokufa kuba
uGugulethu uphela ebulala uThobeka nabantwana bakhe.

Isiphelo

• UGugulethu uyabanjwa agwetywe intambo.

• UMaGaba ongunina kaGugulethu uzityisa ityhefu afe.

• UZwilakhe ekugqibeleni uyavuma ukuba nguye unobangela wayo yonke le

ngxubakaxaka, koko ucela ukuba kuvalelwe yena endaweni kaGugulethu.
• UGugulethu usamkela ngezandla ezingenamikhinqi isigwebo sejaji atsho eyalela okokuba
umzimba wakhe uye kungcwatywa ecaleni kwentombi kaLangeni.

• Umbhali uphumelele ukusebenzise ubuchule obungayiwayo ukukhulisa ibali lakhe

ngokuzisa ingxaki eba ngunobangela kanti ngalo lonke elo xesha uyila isakhiwo

sencwadi yakhe

SEPTEMBER 2018
UMBUZO 3
UZwilakhe ngumlinganiswa oyintloko kule drama.Ngqina oku ngeempawu kunye
neziganeko ezisencwadini.

Zimbini iindlela zokuyijonga le mpendulo.

Omnye angasebenzisa amehlo okuba lo mdlalo uyintlekele aze ke ngoko amjonge ngala
mehlo lo mlinganiswa uyintloko

• Uba ngumntu onezinto ezimenza athandeke abe kwindawo ebalulekileyo ebomini

bakhe abe ke ungutata wekhaya uZwilakhe
• Kufuneka abe nesikhwasilima esinye okanye esiya kukhokelela kwisiwo sakhe
nanjengoko yena ethanda iwonga alinikwa nguMagaba atsho abe
nobungqangangqanga bobuZwilakhe.
• Lo mlinganiswa uthi ngenxa yesikhwasilima sakhe enze into ekhokelela ngqee
kwisiwo sakhe. Sibe ke simbonile uZwilakhe esenza impazamo enkulu yokuthi emazi
uThobeka ukuba akazange ahlangane ndawo nomyeni wakhe wenkani amthumelele
uGugulethu lo mfazi nabantwana abangaziwa mntu. Siyanduluka ke isiwo sakhe
kuba uGugulethu ubaxabela ngezembe bonke naloo Thobeka na kakade kutsho
kudule konke nakuye ukuba ukunyanzelisa umntu akufuneki.

Elinye icala lingavelela oku

• Ngumsunguli wentshukumo ebalini.
• Abachasi basabela isenzo sakhe luqale ulwabhici.
• Iziganeko ezisebalini zingqonge yena kwaye isiganeko ngasinye sikho ngaye.
• Uba nento ayivuzel’izinkcwe kubekho imiqobo ebangela ukuba ifumaneke luzizi loo
nto nokuba uyayizuza.
• Atsho abe nobuntshovuntshovu benkunz’enja ukuze aphule imiqobo esendleleni
yakhe nokuba kumnyam’entla.
Kungavelelwa ezi nkalo kumacala onke ukumbophelela uZwilakhe.
• Umlinganiswa oyintloko ngulo mlinganiswa ubangela izinto zenzeke ngale ndlela
yakhe, uZwilakhe njengoko negama lizichaza unyanzela uGugulethu ukuba atshate
noThobeka ngelithi uneempawu zobufazi.
• Ungumlinganiswa ozotywe waneenkani ephenjelelwa yinkosikazi yakhe, kakade
umlinganiswa oyintloko kufuneka abe nomqolo angajiki lula nje kumnqweno wakhe.
• Akathandisi bani uZwilakhe ngesigqibo sakhe, noGugulethu lowo akamthandisi umi
ekuthini uza kuthatha le ntombi ayibonelwe nguye.

• Umqolo uwunikwe nguMaGaba inkosikazi yakhe xa isithi apha kwayo intombi eza
kurhuqa amajelemane yintombi kaMcothama ayikho enye.
• Wohlukana ke uMaGaba noZwilakhe xa eza kudibana namawabo uZwilakhe malunga
nokuthathelwa kukaGugulethu, uthi uMaGaba ancede ke angazenzi ixoki.
• Ngoku kanye uGugulethu sele esithi ucela ukuzibonela intombi amakayitshate,
ukhaba ngawo omane uZwilakhe ngelithi akanokwaphula isiko.
• UGugulethu ecela ukuba azikhethele intombi ayithandayo nje kungokuba sele
ethembise uNomaMpondomise amthandayo kwaye ikhuphe neenkomo kuba isazi
ukuba kuza ezikaGugulethu.
• Kungenelela abantakwabo uZwilakhe bembonisa ngobungozi bokubonela umfana
intombi, uma entla uZwilakhe kuba ulilandele igama lakhe, ngelithi ingehla ehlayo
kunyuke enyukayo kuza kwenzeka intando yakhe phaya kwakhe.
• Ngoku amawabo emcebisa uZwilakhe, kodwa atsho phantsi baphela besithi
mabamyeke isala kutyelwa sibonwa ngolophu.
• Uthatha unyathelo lokuba kuyokucelwa intombi kaMcothama le ayifunayo.
• Kwimibuzo ebuzwa ngumfundisi xa etshatisa impendulo kGugulethu yayisithi ‘Buzani
kubawo.’
• Mhla ngomtshato uGugulethu ubophe isandla kuba engafuni kuzibophelela
ngokusayina, uZwilakhe uyamsayinela, wathi kumfundisi makaqhube nenkqubo
yokutshatisa.
• Zenzekile izigigaba kwaqala kwahlatywa uNimrod uMzamo ongumhlobo kaGugulethu
mhla ngomtshato.
• UNomaMpondomise uyazibulala.
 • UGugulethu washiya ikhaya lakhe, nanko uZwilakhe esenza eyakhe yambi
ukuthumela uThobeka eMthatha nabantwana abathathu kuGugulethu owalincamayo
ikhaya lakhe.
• UGugulethu ubulala abantwana noThobeka lowo na kakade, abanjwe ke.
• Mhla ngetyala xa agwetywa intambo uGugulethu unina uMaGaba uzityisa ityhefu
uyafa.
• Kwimibuzo ayibuzwayo enkundleni uGugulethu umile ngokuthi, ‘buzani kubawo’,
wade umantyi wayilandela le mpendulo.
• Ekubufumaneni ubunyani bale mpendulo ulumkise abazali bonke ngokunyanzela
abantwana ekubeni batshate abantu abangabathandiyo nobungozi boko, njengale
meko kaGugulethu.
• Waphela ezisola uZwilakhe kodwa engasenakuguqula nto ngoku.
• UZwilakhe ke kuyabonakala ungumlinganiswa omele icala elibi, cala elo eloyisiweyo
kuba iphela incwadi ezisola ngezenzo zakhe ekubeni wayecetyisiwe.
[25]

SEPTEMBER 2019

UMBUZO 4
‘Intlekele ekwidrama ethi,”Buzani kubawo’ idalwe kukungaqondani phakathi kwezizukulwana
ezibini.’Ngqina olu luvo.

• Ingombandela obalulekileyo noxabisekileyo kwintlalo yabantu. Ukuphazamiseka kwalo

mbandela kwenza izinto zingalungelelani kudaleke intlekele.
• Kubakho umlinganiswa oyinjinga yentlekele.
- Lo mlinganiswa uba sisigculelo sentlekele ngenxa yezenzo zakhe.
- Uba ngumlinganiswa obekekileyo ngenxa yezenzo zakhe.
- Uyaqiqa usezingqondweni akabonakalisi butyhakala.
- Ungumntu osesihlalweni esiphezulu nasemagunyeni.
- Usuka abe nobuthathaka obumtyhalela ekubhatyazeni.
- Oku akubi nakuba salungiseka ibe seyihlile intlekele.
- Yile mpazamo nemposiso yakhe edala intlekele.
- Umlinganiswa oyintloko uba namathuba okuba nomvandedwa de azive ethetha yedwa
ngasese sitsho sikwazi ukuvelela imbilini yakhe.
- Zisuka nje lo mdlalo uhlakulela ngemiqondiso efana nomsi ovale indlu ongumqondiso
wokubi okuza kusihlwa, kufingqiza amafu, kuzise izulu kukhala izikhova imikhulungwane
wezinja, imiqondiso yokubi okuzayo
- Ukuqwalasela ezi mpawu nganye nganye sizicazulula ngolu hlobo;

Ingombandela obalulekileyo noxabisekileyo kwintlalo yabantu. Ukuphazamiseka kwalo

mbandela kwenza izinto zingalungelelani kudaleke intlekele.
- Le drama ingomba wentlalo okukwendiswa okanye ukukhetha undofa naye.
Uphazamiseka ngokuthi uZwilakhe onguYise kaGugulethu afune ukukhethela unyana
wakhe intombi amakayitshate ngeli xesha uGugulethu afuna ukuzikhethela. UZwilakhe
umisa ngesiko ngeli xesha uGugulethu abona ukuba luthando olwenza abantu batshate.
 - Isilumkiso sikaZweni, xa efuna ayekwe azikhethele uGugulethu kwiphepha 63 sithi, ‘The
old order changeth yielding place to new…lest one good custom should corrupt the world’
silugelesho, sikrobisa kwinto engehli esenokwenzeka.
- Ithumba liyaqulungana ngokuthi uyise amise ngokuthi akanakufunzwa kanti uza kumfunza
ngokwakhe kwaye umile elizwini lakhe ngelithi nokuba angade achase alale ngomqolo
uGugulethu.
- Kwelinye icala uGugulethu ubuza umbuzo othi, ‘Ukuba ubawo undisa eweni mandiye
nokuba ingozi ndiyayibona kuba ndifuna ukumkholisa?’
- Uthatha isigqibo asilandele sokunika impendulo ethi ‘buzani kubawo’ kuwo ngamnye
umbuzo omalunga nalo mcimbi xa ungahambelani neembono zakhe.
- Akusithatha esi sigqibo uqalekisa nomhla awazalwa ngawo, akanasimilo, uthi ebizwa athi
akezi- noko umntwana womXhosa uyayazi ukuba sukuba kushubile ukuze umntwana
asabele ngolo hlobo.
- Esinye isilumkiso sikaZweni sihamba neziqhamo zonyanzeliso.

Ulwimi olusetyenziswayo kumdlalo oyintlekele

ngunyonyo onuk’igazi
- Amazwi aquphayo angumbuzo ozingileyo asenza sihlale singxangele ukubona ukuba kuza
kwenzeka ntoni kwesi sibini. Akubona ukuba alikho ilizwi
- Ithoni yeyonxunguphalo- Ukusetyenziswa kukaBuzani kubawo kuyo nayiphi into
engumbuzo omawuphendulwe nguGugulethu kudala unxunguphalo. Kwelinye icala
akaZwilakhe amazwi nangona ewatshintsha tshintsha antsingiselo nye, ‘andijiki kuleyo’.
- Ukufunyanwa kukaGugulethu ezula endlini, ephindaphinda amagama manye, ‘Buzani
kubawo’ kubonakalisa ukudandatheka komphefumlo hayi kuGugulethu yedwa nakuthi
bafundi bencwadi esizimanye naye.
- Iintetha ezithi, ‘iinkqwithela, amathunz’omnyama, iintsunguzi zamahlathi Izulu liyadu-
duma, lududuma lidlule nemiphefumlo yabantu…izulu limathumbantaka, Bawo
uyandiqhomfa na?’
- Izilumkiso zikaGugulethu, liduduma lidlule nemiphefumlo yabantu, lenza izigede.
- UMzamo ulumkisa ngamazwi athi ‘isala kutyelwa sibonwa ngolophu.’

Malunga nomlinganiswa oyinjinga yentlekele

- Unento ayixabisileyo ebaluleke kakhulu ebomini bakhe.- isiko.
- Uba nobuthathaka anabo obuthi bumkhokelele kwisiwo sakhe.- Inkani
- Unenjongo afuna ukuyifezekisa- ufuna ukuzekela unyana intombi ayithandayo.
- Wenza iinzame zokufumana le nto ayifunayo- uqweqwedisa amaHlubi ewaqweqwedisela kule
mbono yakhe.
- Kubekho imiqobo esendleleni yakhe yokufumana akufunayo- imiqobo anayo yeyokuba
amaHlubi ayalazi eli siko nokutshintsha kwalo, uMzamo, uGugulethu
ongafuni kusayina nokuvuma esidlangalaleni ukuba uyamtshata uThobeka

abembonelwe nguYise,
 Uba nobuntshovuntshovu bobuntshakavula efuna
ukususa le miqobo nakuziphi iimeko-
- Uqweqwedisa abantu ukuqala kuGugulethu de amtshatele kunye nale ntombi kaMcothama
xa ebophe isandla engafuni kuyitshata, ukuya kumaHlubi.
- Uxolele ukujinga iliso, kungade kube kho indyikityha yokufa kwabantu abangenasono ngenxa
yakhe - kufa imiphefumlo engenatyala kuba xa engakufuni ukutshata uGugulethu
uyamtshatela lize ixhoba lokuqala libe nguNomaMpondomise ofa ngokuzeyelisela emlanjeni
kuba undofa naye wakhe etshatile.
- Emveni kweminyaka elishumi elinesibini, uZwilakhe uthumela abafowabo ukuba baye kulanda
uGugulethu eMthatha akungavumi.
- UZwilakhe akuthumela uThobeka nabantwana eMthatha, uGugulethu ubaxabela ngezembe
ezinzulwini zobusuku bonke bayafa

Uyazisola ngesenzo sakhe/uba nokuzisola

- Ngale mini inye uyavuma uZwilakhe ukuba ungunobangela ngoko isigwebo masiwiswe
phezu kwakhe, inkundla iyala, imgwebe intambo uGugulethu.
- Ngomhla wokuwiswa kwesigwebo, xa uGugulethu egwetywa iinyanga ezintandathu ngenxa
yokubulala uThobeka nabantwana, uZwilakhe uyazisola de athi makugwetywe yena
endaweni yakhe.

Uxolela ukufa/ uyafa/ uyohlwaywa ngesenzo sakhe

- Isohlwayo sakhe sesokuba usele yedwa kuba uMagaba uzityise ityhefu kwangale mini wafa.
- Omnye owohlwaywayo lihlakani lakhe uMagaba unina kaGugulethu othi ngemini
yokugwetywa kwetyala likaGugulethu lokubulala uThobeka, unina uMagaba, aziseze ityhefu
afe.
[25]

NOVEMBER 2018
UMBUZO 5
Bonisa indlela iziganeko eziyikhulise ngayo impixano kule drama.

Impixano yindlela esetyenziswa ngumbhali ukukhulisa ibali lakhe. Oku uthi akwenze
ngokuvelisa ungquzulwano phakathi kwezimvo ezimbini ezithi zimelwe
ngabalinganiswa abangavumelaniyo ngezinto ezithile abazixabisileyo. Impixano indidi
mbini, kukho impixano yangaphakathi nempixano yangaphandle. Impixano
yangaphakathi yimpixano ephakathi komlinganiswa nesiqu sakhe ebangelwa zizinto
ezimngqongileyo entlalweni. Impixano yangaphandle yimpixano ephakathi
komlinganiswa nomnye umlinganiswa okanye phakathi kwamaqela amabini
angavumelaniyo ngomba othile.
Ukukhuliswa kwempixano
• Umbhali kule drama ubeka izimvo ezimbini ezahlukeneyo kuvavanyo, isiko lokubonela
umfana intombi elikhatywa lulo lonke ulutsha ukuqala kuNozipho,Gugulethu,
NomaMpondomise abaziintshatsheli. Ulutsha lunoluvo lokuba luthando eyona nto yenza
umtshato abeke uGugulethu noNomaMpondomise bencama konke ukuze lubonise ukuba
eli siko litshazile alisenandawo entlalweni.
• UZwilakhe uba yinkomo enotshobo efuna ukubonela unyana wakhe ngokuhlohlwa
nguMaGaba umkakhe.
• Umbhali unika uZwilakhe isihlalo sokuba ngutata wekhaya ukuze nantoni na ayithethayo
ibe nendawo yokuhlala nakubani, nanjengoko yenzile aze uGugulethu abe ngunyana

omele kuthatha nantoni na ayalathelwa nguyise ngokwesithethe sakwaNtu aze azibeke

esikalini ezi mbono zombini ngolu hlobo:

• UWK Tamsanqa ongumbhali wale drama ufaka uGugulethu exabisweni lokufuna umfazi
ngokweminyaka engama-30 ngokwebali.  Oku kuba yinto enokozwayo akuya

emtshatweni kwaNgoqo uMagaba kuba ebonele unyana wakhe le ntombi kaMcothama.

• Isifungo asithatha ngale ntombi sinwenwa okomlilo wedobo ukuthungela

ukugrogrisa uZwilakhe ngokungabi namandla obudoda xa engena kuyithathela

unyana wakhe le ntombi.

• Esi soyikiso uZwilakhe simenza abhuduzele ade enze impazamo yokuthi kuGugulethu
akanakufunzwa kuba akasengomntwana.
• Intlantsi itaka kutoliko lwala mazwi athi 'akusengomntwana … awusenakufunzwa …
UGugulethu uwatolika la mazwi ngokuba athi makazifunele umfazi kanti uyise yena
uwatolika ngokuba amnika amagunya okusebenzisa isiko lokubonela. Utshela kweli siko
okwengwane uZwilakhe noko ebona ukuba unyana uthabathekile leli lungelo.
• Kwelinye icala umbhali uthela ipetula kulo mlilo ngokuthi kufikisane eli lizwi
lokungafunzwa kunye nencwadi kaNomaMpondomise eyamkela isicelo sikaGugulethu
sothando.

• Le yantlukwano phakathi kokuzibonela nokubonelwa yenza uthanda phakathi

kwamaHlubi kuba kukho ahamba noGugulethu ngembono abe uyise exela izinyo
liqaqamba eqamele ngokuba akanakulunga ukuba liwexuwexu- kungekho mntu
ubuqondayo obu buwexuwexu ukuba busuka kwisivumelwano sakhe noMaGaba.
• Oku kwenza uGugulethu angene kwelinye inqanaba, elokuvala umlomo athi
kwakubuzwa nantoni athi makubuzwe kuyise- ubungqina bokuba imdla ngaphakathi le
nto. Kuyacaca ukuba lo ‘Buzani Kubawo’ yindlela yakhe yokubhalisa unkwintsho
ngokusuka atshatiswe nomntu angamaziyo.
• Ukungenelela kukaMzamo ngokuya kuthethathethana noZwilakhe kumshiya nesilumkiso
uZwilakhe kuyikhulise ngakumbi inkxalabo kuba ithemba lakhe ibileli kholwane lakhe lidla
ngokumkhululela amaqhina kodwa suka eli laqanyangelwa ukubotshwa oku.
• Kuyanda ukungakhelani mililo kwabantu abadala nabatsha kuba
uNomaMpondomisenaye, ngokukhulelwa luthando lukaGugulethu ukhupha iinkomo
zikaMcunukelwa kodwa yena asuke ancame akwamkele okumehlelayo.

• Imini yomtshato kaGugulethu iyafika- uGugulethu obesele ekwelinye ilizwe

ngokukhathazeka osebenzisa ulwimi olunqungunqungu-obona iindudumo, imibane
etshawuzayo ngesehlo ngasinye imenze uGugulethu akubonise esidlangalaleni
 ukungahambisani noyise ngokuqamangela isandla sakhe ukuze angatshatiswa
ngumfundisi. Nangoko uZwilakhe ubona kulungile ukuba amtshatele ngokumsayinela

unyana wakhe. Kodwa kukhamnqise wonke umntu oku.

• Umbhali wenza imini yomtshato kaGugulethu ibe ngundabamlonyeni ngokuthi kufe
uMzamo, atsho eve uNomaMpondomise ngomtshato aqalise ukuzizonda de azonde

isidalwa esiyindoda, athathe amanyathelo asemthethweni okumangalela uGugulethu

ngokwaphula isithembiso.  Ngemini yetyala uGugulethu noNomaMpondomise

bazibopha ngelabo iqhina lomtshato, azeyelisele emlanjeni afe uNomampondimise.

• Ibali lilonke ngoku linuka igazi, ulwimi oluthethwayo lunzulu, izinto ezenzekayo
ziyakhamnqisa. UGugulethu oko wemka ekhaya zange wawubeka umcondo ekhaya.

UMthetho noNyaniso bakuya kuGugulethu babuya nelizwi elithi makubuzwe kuyise

kaGugulethu.

• Eyona mpazamo yeempazamo yakuphela iminyaka eli-12 uGugulethu elikhalele

ikhaya, uthunyelelwa nguyise umfazi onabantwana abathathu, ivele xa kulapho

ingqumbo kaGugulethu abagawule ngezembe bonke bafe. Nalapha ulwimi lukhala

ngezulu, ngeengqimba zamafu- inkundla yamatyala iyamgweba uGugulethu

ngesenzo sokubulala.

• Uyise uZwilakhe uyazigweba ngesenzo sokunyanzelisa nokulahlekisa isizwe.Kuba

yindyikityha yokufa nanjengoko noMaGaba ezityisa ityhefu.
• UGugulethu uyalela ukuba umzimba wakhe ubekwe ecaleni komzimba
kaNomaMpondomise.

NOVEMBER 2019
UMBUZO 6

Uthando kule drama lube ngunobangela wokugilana kwezimvo okuthe kwakhokelela

kwimpixano phakathi kwabalinganiswa nto leyo ethe yakhokelela kwiziphumo ezibi
eziquka inyhikityha yokufa.

• Uthando lukaMaGaba kunyana wakhe lumenza acinge ukuba into ethandwa nguye nonyana
wakhe woyithanda ade abe kwiqondo lokunyanzelisa umyeni ukuze umyeni aqweqwedise
unyana nto leyo eye yakhokelela kwimpixano emandla phakathi kukaGugulethu nabazali bakhe.

• Eyona nto ithi iyikhulise ngakumbi impixano kukuma kukaMaGaba aqine kuba efuna
intombi kaMcothama uThobeka ayithandayo itshate noGugulethu.
• UZwilakhe uyathoba kuba ke naye egrogriswe nguMaGaba ngokubeka ubudoda
bakhe esikalini xa enokoyiswa ngulo mcimbi. Oku kwenza uZwilakhe athi esiva
macalonke ukuba uGugulethu uthi lo mcimbi wentombi mawuyekelwe kuye kuba
ezazi yena ukuba ikhona intombi esenyongweni kuye enguNomaMpondomise
azimisele ukuyitshata. Impixano iye yondela ngakumbi nangakumbi kuba ecaweni
sibona uGugulethu ebophe isandla sakhe kuba engafuni kutshata noThobeka. •
Ukungaboni ngasonye kwabazali nabantwana babo ngomba wothando kube
ngunobangela wongquzulwano olubanzi phakathi kwabo.
• Ukwamkelwa kwesicelo sikaGugulethu nguNomaMpondomise kokona kwenze ukuba
angqishe ngonyawo noGugulethu kwelakhe icala engafuni kwahlukana nomntu

osenyongweni kuye nambona njengoyena ndofanaye kuko okuthe kwayenza yakhula

ngakumbi impixano.
• Ukukhupha kukaNomaMpondomise iinkomo zikaMcunukelwa ebesele elotyolwe
ngazo kuba esithi akamthandi kwaye exolele ukuba lihlazo nokuhlupha abazali bakhe

kunokuba endele endodeni angayifuniyo kube ngunozala wempixano phakathi

kwakhe nabazali.
• Iindaba zokutshata kukaGugulethu ezipapashwe kwiphephandaba iMvo
zabaNtsundu elifundwe nguNomaMpondomise zimenze wanempixano
yangaphakathi kwaye ziye zamkhathaza emphefumlweni kuba ebecinga ukuba uza
kungenisa iinkomo zikaGugulethu njengoko ekhuphe ezikaMcunukelwa.

• Impixano yangaphakathi kuNomaMpondomise iye yathatha olunye unyawo kuba

uncame ngokuzeyelisele emlanjeni eMthatha xa ephoxwa nguGugulethu ebecinga

ukuba uza kutshata naye.

• Impixano yangaphakathi nothando lwakhe kuNomaMpondomise ongasekhoyo iye

yondela ngakumbi kuGugulethu kuba ubonakala ngokuzila ikhaya, anxibe iimpahla
ezimnyama, iminyaka ede yadlula kwishumi elinambini, ome emqaleni kuZwilakhe
obefuna ukumfuthanisela ngomfazi angamthandiyo.
• Isenzo sokuthumela uThobeka eMthatha kuGugulethu ongazange amthande
nabantwana bakhe abathathu idala ungquzulwano olumandla kude kukhokelele
kwinyhikityha yokufa, isiza ngoGugulethu othe wagawula ngezembe abantwana.
Isenzo esi senza sikholelwe kukuba kwayena, waphumayo kwisiporo sengqondo
ezinzileyo ngenxa yoxinzelelo lomphefumlo oluzalwa kukuchukumiseka ngenxa
yothando.
• Le mpixano noku kuphazamiseka ngokwengqondo kukaGugulethu okwenziwe
luthando olungazenzisiyo ngumqondiso wothando olungenamida.
• Ukunyanzeliswa kwesiko lokubonelwa ngabazali abantwana bengathandani kube
ngunozala wempixano ekule drama.
NOVEMBER 2021
UMBUZO 7
‘Umntwana bantwana bam ongenantlonelo kumzali wakhe imihla yakhe mifutshane phantsi
kwelanga.’
Hlalutya uluvo lukamfundisi olungentla ngokwehle kule drama.
Igama 'umntwana' libhekisele kubalinganiswa abalulutsha abakule ncwadi yedrama. Intlonelo
iquka ukuzithoba, ukumamela ukuthatha ilizwi labadala ulilandele ngokwabantu abadala.Kanti ke
inokuba silibele ukuba kwiimeko zokuqhutywa luthando intlonelo kuxhaphakile ukuba ingabi naso
isihlalo. Ngokoluvo lukaMfundisi abantwana abangahloneli abazali baba nobomi obufutshane.
Ngokwale drama olu luvo luyangqineka nangona ikho nendlela olungachaseka ngayo. Bakho
ababhudileyo ababahlonela abazali babo abanye babahlonela kodwa ngokulinganayo bazibona
begaxeleka kwiimeko zobomi ezikrakra. Isincoko singachaphazela iimeko zaba balinganiswa,
UGugulethu, uMzamo, uNomaMpondomise, uThobeka.

• UGugulethu ngomnye wabalinganiswa abathe babonakala ngokungathi

abanantlonipho waze waphila ubomi obufutshane. Xa sizikhumbuza ngaye,
sihlangana naye ekhunjuzwe nguyise ngexabiso akulo elenza ukuba • kulindeleke
kuwonke wonke ukuba azeke. Uyavumelana nabazali ngalo mba kodwa
akuvunyelwana ngokuba nguyise omakabonele uGugulethu umfazi.
• Impazamo isekubeni abazali besithi mdala akanakufunzwa kube ngokwakuye
• babonakala bencwase ukumfunza kuba babuye bambonele lo mfazi ngokwabo. Oko
kungqamana nemini yomtshato apho ahlangana noNomaMpondomise awamthanda
kwakudala. Kuye lixesha lokuzithethelela ezalisekisa lo mnqweno wakhe nabazali
kanti uMagaba noZwilakhe bavalelene ngokumzekela. • Ukuvuma
kukaNomaMpondomise ukutshata uGugulethu kungqamana nesigqibo sabazali
sokuba baza kumbonela kuba uselula akakazi nto ngomfazi. Ubushushu begazi
buyangenelela kuba uGugulethu akaziniki thuba lakumcenga yedwa uyise, engaziniki
nelokucenga unina ongumsunguli wale ngxubakaxaka. Zisuka nje uthatha isigqibo
sokungaze aphinde aphendule mntu ngalo mba kuba ngokwakuye akukho mntu
ufuna kummamela.
• Iqhabalaka ibhobhile ngokusuka afuthaniselwe bubushushu bokuzibona ethembise
uNomaMpondomise angasakwazi kuthetha nto kuye ngale ngxaki esoyika ukuba
lixoki kanti noyise akafuni kuba lixoki enkosikazini yakhe kuba uthembise
ngokuyimela le nto akukhunjuzwa ngobudoda bakhe obusemngciphekweni
ngumfazi.
• Ukungahloneli kusekubeni sele ebizwa uthi makubuzwe kuyise konke ngalo mba.
Ukude aye kufika ecaweni apho amele kutshatiswa nalapho uzinge ngebinzana
elinye, kwaye lo mba uguqukile sowukwinqanaba lomzabalazo. Bonke abazali, wena
Mfundisi, wena Hlubi bapeyintwa ngebrashi enye – le ka 'Buzani kubawo'.
• Oku kungathethi namntu kuthathwa njengemeko yokungabi nantlonelo ingakumbi
kuba akazenzi nezinto acelwa nayalelwa ukuba azenze koko sisimbonono sika
'Buzani kubawo'.

• Ooyisekazi uMthetho noNyaniso bancama ibe ngabo abazithoba kuye bemcela ukuba
acingisise nangoku selede walifulathela ikhaya. Nalapho ubonakalisa ukuzala
ingqumbo engazange imncede.
• UGugulethu akabahloneli ooYisekazi xa bembiza ukuba aze kuziphendulela kwindaba
yokuba ebonelwa umfazi ngokuthi angezi kuba ekhalele, oku kubangela ukuba
kuthathwe isigqibo ngaphandle kwakhe engakhange azinike ithuba lokuba avakalise
izizathu zakhe ezibangela ukuba angafuni kutshata noThobeka.
• Ukuqhubekeka komtshato kumbeka ecaweni phambi komfundisi apho asuke
anganiki ntlonelo kubazali, kumfundisi kunye nabantu abaze emtshatweni xa
ngokuthi angavumi ukwenza izibhambhathiso kunye nokutyikitya isiqinisekiso
somtshato wabo luphela utyikityo lusenziwa nguyise, uZwilakhe. Le ndelelo kubazali
nakumfundisi imzisela ilishwa lokuba aphulukane nomhlobo bakhe uMzamo
ehlatywa kanye kulo msitho wakhe.
• UGugulethu khange abonwabele ubutsha bakhe ithuba elide kuba wazibona elilolo
elikwimo yoxinzelelo waphazamiseka engqondweni wagqibela ngokwenza isihelegu

sokubulala uThobeka nabantwana. Oko kumdudulela kwiinkundla zamatyala nalapho

aphela egwetywa intambo babe buyaphela ubomi bakhe eseze ngobuso elizweni.
• UMzamo ngumlinganiswa ongumntu omtsha, udlala indima yokuba ngumlingane
kaGugulethu olikholwane likaGugulethu. Xa ebona ugxa wakhe ephuke umoya uziva

efuna ukungenelela aye kuZwilakhe ngesi sihelegu sehlele ugxa wakhe. Nobushushu

begazi uzibona engena kwiintshwabulo eshwabulela umntu omdala. Amazwi, athi

isala kutyelwa sibona ngolophu aziwa njengezishwabulo ngamaXhosa atsho abonwe

njengongenantlonelo. Oku kushwabula kubangela ukuba angabonwabeli ubutsha

bakhe kuba ubomi bakhe banqunyulwa esemtsha ngokuhlatywa nguNimrod

asweleke.
• UNomaMpondomise ukolu lutsha luqhutywa ziiimpembelelo zothando. Yena
ngokuthi swii nguGugulethu ukhupha iinkomo zikaMcunukelwa abazali bakhe
bemnqanda ngethemba leenkomo zikaGugulethu amthandayo. Akeva kucetyiswa de
athi eboniswa ukungalungi koko akwenzayo aqhube. Oku kungabi nantlonipho
kukhokelele ekubeni angawufumani loo mtshato ebenethemba lawo
kuGugulethu.Ngoko nangoko uphulukana nobuyena akufumana iindaba zokuba
uGugulethu sele etshatile. Ukungonwabi kumdudulela enkundleni yamatyala
emangalela uGugulethu. Icace gca ukungabikho le yakhe intlonelo kuba wenze

isimbonono sokucela uxolo kubazali bakhe kuloo nkundla engaqondwa kanti inxeba
linzulu.Uphuma apho aye kuzeyelisela emlanjeni. Waba ubushunqulele ubomi bakhe
ngokungabi nantlonelo.

• Bakho abalinganiswa abathe nangona bengakhange badelele banelishwa.

Kuyacingeleka ukuba amazwi kaMfundisi awanandawo kwiimeko zabo.

• UMcunukelwa ngomnye wabalinganiswa abathe bahlonela abazali babo kodwa

 kunjalo waphela engabunambithi ubomi bakhe bobutsha mhla ephoxeka

kuNomaMpondomise othe wabuyisa iinkomo zelobola. Oku kwambangela ukuba

ubomi obumnandi ebezithembise bona buphele phakathi waphela edandatheka

umphefumlo.

• UThobeka ungumlinganiswa oye wabahlonela abazali bakhe wathi noxa mhla

eyocelelwa uGugulethu nangona wayebonakalisa ukungayithandi le nyewe kodwa

kuba efuna ukuhlonela abazali waphela esiya emzini. Uye wazishunqulela ubomi

obumnandi bobuntombi wazithi nka ngomzi apho angafunwa khona.

• Ukuhlonela isiko nelizwi labazali kunye nelo lasemzini uye ahlale nangona iimeko
ezibona ukuba zimbi kuba uGugulethu ebonakalise phandle ukuba akamfuni
ngokungatyikityi isivumelwano somtshato wade wazila nekhaya sele esithi
uswelekelwe ngowakhe umfazi.
• Uzibona elikhoboka lokuzaliswa abantwana bade babe bathathu ngumntu
angatshatanga naye aphinde ngenxa yentlonelo yomzi avume ukusiwa kuGugulethu
kunye nabo bantwana abangengobakhe oku kubangela ukuba ubomi bakhe
bushunqulelwe phakathi engakhange abunambithe kuba waye wabulawa
nguGugulethu kunye nabantwana bakhe.

Nangona incwadi iqaqambisa ukuba abalinganiswa abatsha abangenayo intlonelo

kubazali nakwisiko labo, baphela bengonwabi baphela bezibulala okanye bebulawa,
bakho nabo baphinde bangamaxhoba okuhlonela isiko nabazali ngokugqithisileyo nabo
baphile impilo engonwabanga, bekwimo yoxinzelelo bade bashunquleka ubomi

babo.