Vawiinah hian chhandamna kawng butsaih chungchang leh Israel fate hnena thlamuanna thuchah

chungchang te kan zir ho leh dawn a ni.

*1.KAWNG DALTU THIAN FAI TURIN PATHIANIN A MITE A KO.(57:14):

He lai chang hi Isaia 62:10 thu nen pawh a inzul hle mai. Zawlnei kal tlangin Lalpa Pathian chuan a mite
tan kawng buatsaih turin a ti a, chu chu an tluk lohna turin a ni.“Kawng” tih chungchangah hian pawm
dan chi hnih a awm thei niin a lang a, lehlin tharah chuan kawng/lamlian tih chu Babulon aṭanga
Jerusalem panna kawng, tiin a sawi.

Babulon aṭanga Juda ram lam pan tur chuan a tlangpuiin lui dung an zawh ṭhin a, hmar lamah
Mesopotamia kal tlangin , chuta tang chuan Suria chhak lamah an kal a, chhim lam panin an kal ta zel
ṭhin. He kawng hi Babulon aṭanga Juda ram kal tura thlaler zau tak pumpelhna kawng a ni(Isaia 40:3).
Kawng laka tluk sual an tawh lohna turin he kawng hian chhung pawn leh siam rem a mamawh hle a ni.

Pawm dan dang lehah chuan he laia “Kawng” tih hi kan hmuh theih kawng sawina hi ni lovin, Pathian thu
dawngsawng thei tura thinlung lam lo buatsaih lawkna leh keimahnia tlukna sual te chu paih a, Pathian
tana kawng siam sakna lam a kawk thung.

Lalpa Pathianin kan tana chhandamna min buatsaih sak hi chang tur chuan Lalpa kal tlangna kan nih
theihna turin kan thinlung ṭheuhah Lalpa tan kawng kan lo buatsaih a ngai a, a kal tlangna dal theitu leh
min ti hnawk theitu thil chi hrang hrang Lalpa duh loh zawng keimahni-a bet tlat te hi kan paih bo a,
Lalpa tan kawng hlun kan nih theihna tura kan lo inbuatsaih a ṭul hle a ni.

*2. A MITE SUALNA A NGAIDAM(57:15-19):*

Lalpa Pathian chuan a nihna sawi langin, tuma tluk loh leh el phak loh , chatuan mi, a bul leh a tawp
pawh nei lo, chatuana awm zel tur, tawp ni nei lo a nih thu leh mi thianghlim a nih thu a sawi a, a chenna
hmun pawh hmun thianghlim a ni. Chuta ṭang chuan mi hmuhsit leh tihduhdah tuar te ti harh turin an
hnenah a cheng ṭhin a ni.

Lalpa Pathian chu Pathian ropui, Van chung sang tak leh hmun thianghlima cheng ni mahse, a hminng
avanga hmuhsit leh endawng, tihduhdah tuar tute chu a kalsan thei lo a, an hnenah chengin a thlamuan
ṭhin a ni.
Keini pawh hian lungngaihna leh manganna, tihduhdah leh cheksawlh pawh tawkin he leiah hian rethei
tak leh hrehawm takin awm ṭhin mah ila, Lalpa chuan min hrerenga, min kalsan thei lo. Hmun tin mai hi
a vil reng ṭhin a ni.

Lalpa chu hmangaih Pathian a nih miau avangin a mite chuan hawisanin, milem pathian te biak sanin
amah ngei pawhin a fate chu han hrem ṭhin bawk mah sela, a duh taka a siam te an nih miau avangin
kum khuain a hawisan thei lo. A thinurna pawh a hre reng dawn lo a ni. A chhan chu a mi te, a hmangaih
te an ni a, a hmaah chuan an chau chhe mai ang tih a hlau a ni.

Lalpa duh loh zawng kawng zawhin,Amah chu sawi chhiain khawvelah hian nawmsip bawlin tlan tlan
ṭhin mah ila, inchhira a hnen kan pana, a angchhunga kan tluk luh phawt chuan Lalpa chuan min lo
hawisan thei lo, min hmangaih em avangin kan lakah pawh a thinur reng thei lo a,a hmangaihna ban thui
tak chuan sual khura kan pil mek lai pawhin min lo kuangkuah reng ṭhin a nih hi. A va ropui tak em !

A mite chu an luhlul ngang ngang hle mai a, an duham em avangin an lakah thinurin a vua a, chuti chung
chuan harh chhuah a hnekin sual kawng an la zawh zui ngar ngar mai a ni. An luhlul avanga a hremna
chuan a sim tir chuang lo a, chuvang chuan a hnenah hruaiin a thlamuan ang a, a ngaidam tawp mai
dawn ni. Chutiang zelin an tuarna sun puitute hnenah pawh thlamuanna a pe ve dawn a ni.

Israel fa, hrehawm tuara rum ṭhin te chu remna leh muanna hnuaiah an lo awm tak avangin, an
lungngaihna te pawh lawmnaah inthlak in, fak hlain an ka chu a khat tawh zawk dawn a ni.

*3.SIM DUH LOTE ERAWH CHU AN BORAL ANG (57:20-21):*

Lalpa’n chhandamna a buatsaih hi mi zawng zawng tan a nih rualin sual kalsan duh lo leh sim duh tlat lo
te chu hnawl an ni ṭhin. Chuting mite chuan tuifinriat fawn vel ang maiin chawlhna reng an hmu lo
a,ngaihdam an nih inhria te leh pawm tute angin thlamuanna an hmu hek lo. Tuifinriat fawnin a mawnga
bawlhhlawh awm te a vawrh chhuak angin thu awih lo leh sim duh lo,ngawhngawl chhuah tlat te chu
Pathian hnen aṭanga vawrh chhuahin an awm ve dawn a, chutiang a nih avang chuan misual te chuan
thlamuanna reng reng an hmu zo dawn lo a ni.

Keini pawh hian kan sual te simna tura hun ṭha kan neih hi kan bawh pelh a, Pathian lakah ngawhngawl
chhuah a kan hawisan reng chuan Lalpa hian kan lam a lo hawi reng bik dawn lo. Tuipuiin a chhunga
bawlhhlawh awm te vau kam lamah a hnawl chhuak ang maiin Pathian hnen ata hnawl bo vin kan la
awm ve thei a ni. Chuvang chuan “Hmuh awla a awm lai hian Lalpa hi zawng ila,a hnaih lai hian I ko ang
u.”(Isaia. 55:6).